*الأستاذة بشرى الخليل حيطا مش واطي*

*بقلم علي خيرالله شريف*

هيدي الست المحامية بمليون رجل،
هيدي الست المحترمة الشامخة، بتمثل أبناء الجنوب والبقاع والضاحية وكل حبة من تراب لبنان ومياهو وبحرو وينابيعو وكل قمة ووادي من جبال لبنان الشامخة ومن تلجاتو الناصعة ومياتو العذبة الباردة على قلوب ولاد هالإرض الطاهرة.
بشرى الخليل، بنت الأصالة والإباء وبنت الأرض يلي بتفرخ أسود ورجال أد الدني ونساء أخوات رجال.
الست بشرى بتمثلني وبتمثل كل شعب لبنان الأبي، وبتسوى وطن، لأنها بتمثل ضمير كل حر بهالوطن وبتمثل كل القيم الوطنية الحقيقية في زمن القحط وتكاثر الطفيليين.

بشرى الخليل أكبر بآلاف المرات من حكومة بتركع قدام شقفة مبعوث أميركي راعي بقر مجرم سفاح حرامي، طالع من الخمَّارة وإيديه ملوثة بدم أطفال غزة وجايي ينَظِّر علينا بالديمقراطية والحرية وحقوق الإنسان.
بشرى الخليل بتمثل كل شريف بلبنان وبالعالم، ونحن معها وسند الها بالكلمة والموقف والقلم والمنبر، وبالدم يلي بيرخص للشرفاء أمثالها.

بشرى الخليل مش هيي لي بتُستدعَى للتحقيق، لأنها هيي ميزان التحقيق، وهيي بتمثل القضاء الحر النزيه يلي لازم يحكم لبنان ولازم يستدعي للتحقيق كل العملا والفاسدين والمحرضين ودعاة الفتنة والمروجين للعمالة بهالبلد، من أكبر راس لأصغر راس.

بشرى الخليل حيطا مش واطي، وكلنا بشرى الخليل ورح يضل راسها مرفوع فوق السحاب.

الاثنين ٢٥ آب ٢٠٢٥